Уште еден македонски репрезентативец ќе ги брани боите на унгарскиот клуб МТК од Будимпешта во чии редови веќе настапува Бојан Миовски.

Денеска МТК ја информираше јавноста дека нов член на оваа екипа е 31-годишниот централен играч од средниот ред, Стефан Спировски.

Во кариерата веќе има настапувано во Унгарија, поточно за составот на Ференцварош од 2017 до 2019 година кога имаше 40 настапи и пет голови и со кој воедно освои титула во тамошното првенство.

На клупски план беше дел уште од Пелистер, Борац Чачак, Работнички, Берие, Вардар, Хапоел Тел Авив, АЕК Ларнака и Мариупол.

Од МТК велат дека Спировски често доби шанса да придонесе и во нападот, а воедно потсетуваат дека македонската А репрезентација ќе игра во баражот за пласман на Светското првенство во Катар годинава и за кое токму двајцата наши играчи ќе се борат во март во запишување на нова историска страница.

МТК нема најдобри резултати во шампионатот, моментно е на претпоследното 11 место со 15 бодови и во вториот дел од сезоната ќе има за цел да обезбеди опстанок.