Во мензата на компанијата „Мета“ во Минхен е воведен робот-готвач, кој со помош на вештачка интелигенција подготвува оброци за вработените, соопшти производителот „Циркус“ (Circus SE). Модулот CA-1 комбинира роботски раце и индукциски плочи за готвење.

Машината зема состојки од ладилниците, ги загрева и го сервира оброкот за три до четири минути, а потоа автоматски ги мие садовите.

Менито вклучува јадења како паста, леќа и салати, а оброците се подигаат со Кју-ар (QR) код. Цената е меѓу 5 и 6 евра по порција.

Според основачот на „Циркус“, Николас Булвинкел, роботот може да подготви до 100 оброци на час и да го намали трошокот за персонал за 95 отсто. Машината се полни со свежи, претходно подготвени состојки и се одржува еднаш дневно. Цената изнесува околу 250.000 евра, а месечната лиценца почнува од 10.000 евра, зависно од менито.

По воведувањето во „Мета“, интерес за ваквиот робот-кувар покажаа и компании како „Хенкел“, „Старбаг“, „Мерцедес“ и други.