Преживувањето повеќе од една година без храна и вода звучи како невозможна задача, но еден човек чудесно успеал во тоа. На она што требало да биде едноставно дводневно риболовно патување, Хозе Салвадор Алваренга се нашол изгубен на море 15 месеци, пловејќи повеќе од 6.500 милји, пишува „ЛЕДБајбл“ (LADBible).

Алваренга во тоа време имал 33 години и бил искусен рибар, со децении лов на ајкули. Планирал риболов со пријател, но кога не можел да стигне, решил да го земе со себе 22-годишниот работник Езекиел Кордоба, кој немал искуство на море. Тие тргнале од Мексико во 2012 година и на почетокот сè одело според планот. Но, кога почнала бура, тие решиле да ризикуваат и да останат на вода – одлука што ќе ги одведе во борба за своите животи.

Големи бранови го преплавиле моторот на нивниот брод и ги однеле далеку во океанот додека бурата се засилувала. Ветерот, дождот и брановите ја уништиле речиси целата опрема што ја имале со себе. Според „Гардијан“, Алваренга подготвил за патувањето 70 галони бензин, 16 галони вода, 23 кг сардини за мамка, 700 куки и километри најлон, харпун, три ножа, три кофи за балирање, мобилен телефон (во пластична кеса), GPS уред и двонасочно радио (со полупразна батерија) и 91 кг мраз.

Тој се обидел да контактира со копното преку радио, но помошта не стигнала. Последните зборови што ги слушнал биле: „Ајде, навистина ме зае**ава ова горе“. Бурата траела една недела, а кога конечно престанала, двајцата се нашле изгубени во отворениот океан – без храна ниту вода за пиење.

Во очајна борба за преживување, тие пиеле крв од птици и дождовница, ловеле риби и желки. „Му се молевме на Бога да ни прости што сме толку лоши синови. Фантазиравме да ги прегрнуваме и бакнуваме нашите мајки. Ветивме дека ќе работиме понапорно за да не мораат тие повеќе. Но, беше предоцна“, се присети Алваренга.

По 10 недели на море, Кордоба починал – тој се разболел сериозно откако изел птица. Алваренга останал сам, халуцинирајќи и разговарајќи со „присуството“ на својот пријател, чувствувајќи се виновен за неговата смрт.

Алваренга, исто така, бил сведок на целосната рамнодушност на луѓето. „Тој видел контејнерски брод и мафтал за помош. Екипажот го отпоздравил назад, а потоа само продолжиле. Тоа целосно го скршило“, рече поранешниот американски амбасадор на Маршалските Острови, Том Армбрустер.

По 15 месеци талкање, тој стигнал до мал, ненаселен остров на Маршалските Острови. На 30 јануари 2014 година, тој го пронашол домот на еден локален пар кој го спасил. Неговата приказна брзо станала позната како „Вистинскиот живот на Пи“, поради нејзината необична сличност со познатиот филм и театарска претстава.