ВИДЕО: Пронајден тешко повредениот параглајдерист на Галичица, со хеликоптер пренесен во Скопје
Спасувачите од планинарската спасувачка служба од Црвениот Крст Охрид пристигнаа на падините на Галичица на местото на кое падна холандскиот параглајдерист, соопшти ЦУК.
Параглајдеристот поради сериозните повреди на ‘рбетот е имобилизиран со вакуум душек и шанцова кравата и со помош на полициските специјалци од Тигрите е сместен во хеликоптер на МВР.
Хеликоптерот е на пат за Скопје каде повредениот турист ќе го презеде медицински тим, соопшти Центарот за управување со кризи.
-Алпинистичкиот тим на САЕ Тигар во 17.00 часот со хеликоптер пристигна на местото на несреќата, го фиксира и го презеде повредениот холандски државјанин Л.Г.Ј.(35), кој претходно беше имобилизиран од екипа на Планинарската спасувачка служба на Црвен крст Охрид и во 17.15 со хеликоптерот од Хеликоптерската единица за полициски намени, која е дел од Одделот за воздухопловни операции на МВР, стартуваше со транспорт кон Скопје. Во 17.50 часот тимот од МВР со повредениот слета на хелиодромот во Комплекс клиники и во координација со лекарите од клиниките, лицето во придружба на животоспасител од САЕ Тигар, на негово барање, во 18.10 часот е префрлено во приватна медицинска установа за укажување на лекарска помош, соопшти СВР Охрид.