Своето разрешувањето од директорската позиција во детската градинка „Детска радост“ од Општина Гази Баба, Анета Петровска го смета за политички притисок од страна на градоначалникот Бобан Стефковски.

Таа во студиото на Утрински брифинг заедно со адвокатката Златка Денковска објасни како дошло до разрешувањето една година по нејзиното именување, и пред истекот на четиригодишниот мандат на раководното место во градинката.

-Мојот мандат започна во март минатата година, но со промена на власта и со доаѓање на градоналаничката функција на Бобан Стефковски наидов на огромен притисок и на секој можен на мојата работа да се опструира, изјави Петровска, доскорешна директорка на градинката „Детска радост“.

Таа вели дека Управниот одбор назначил човек без ревизорска лиценца да направи ревизија на нејзиното работење, а наводните наоди за неправилности биле искористени за да се разреши од функција.

-Сметам дека политички сум разрешена, бидејќу уште на првата средба со него тој ми најави дека ќе бидам директор до после Нова година, без да прецизира кога. После Нова година во нашата институција дојде ревизорот Добри Петров, кој што на 3.01 прави ревизија без да дозволи мое присуство во канцеларијата каде што ги бараше документите. Дојде со овластување од градоначалникот, објаснува Петровска.

Таа вели дека не и било дозволено да присуствува во канцеларијата додека назначениот нелиценциран ревизор ги прегледувал документите.

-Колку што имам информација тој е вработен како советник во ревизорско одделение. Без да ми приложи лиценца за ревизор, го направи тоа ревизорско истражување, за веќе на 4.01 бев повикана кај градоначалникот и со тој извештај што беше пред него, ми кажа дека јас повеќе нема да бидам директорка, вели Петровска.

Дополнително, адвокатката Денковска додаде дека лицето задолжено за ревизија,  во моментот на презентирање на извештајот веќе било назначено за директор на Јавно комунално претпријатие.

Градоначалникот на општина Гази Баба, Бобан Стефковски беше поканет во денешната емисија за да одговори на овие обвинувања, но како што ни кажа по телефон, поради веќе закажани работни обврски не можеше да присуствува, а свое гостување најави во наредните денови.

Адвокатка Денковска вели дека ќе ги искористат сите правни средства на располагање. Таа додаде дека повикале стручни луѓе од МТСП за да го разгледаат случајот, но Управниот одбор на градинката сепак не го почекал нивниот извештај.