Долгоочекуваниот трејлер за филмот кој ќе ја раскаже животната приказна на британската пејачка Ејми Вајнхаус конечно е претставен на платформата Јутјуб, пишува „Би-би-си“.

Биографското остварување „Враќање кон мрачното“ („Back to Black“) е во режија на режисерката Сем Тејлор-Џонсон, а Вајнхаус ќе ја отелотвори младата актерка Мариса Абела.

Филмот го следи раниот подем на славата на Вајнхаус и објавувањето на нејзиниот албум со ист наслов, добитник на Греми.

„Раскажан од перспектива на Ејми, филмот ќе ја прикаже жената која стои зад глобалниот феномен и врската што го инспирирала еден од најлегендарните албуми на сите времиња“, се вели во синопсисот на филмот.

„Не пишувам музика за да бидам позната. Пишувам песни затоа што не знам што би правела ако не пишувам“, вели Мариса Абела во трејлерот, глумејќи ја музичката легенда.

Вајнхаус почина на 27-годишна возраст, во 2011 година, од труење со алкохол.

Саканата баба на Ејми, Синтија, ја игра Лесли Менвил. Џек Оконел го игра сопругот на Вајнхаус, Блејк Филдер-Сивил, со кого пејачката беше во брак од 2007 до 2009 година. Еди Марсан го глуми таткото на Вајнхаус, Мич Вајнхаус. Актерката Џулиет Кауан ќе ја видиме како мајката на Вајнхаус, Џенис Вајнхаус-Колинс.

„Враќање кон мрачното“ („Back to Black“) ќе почне да се емитува на 10 мај годинава.

Поранешниот сопруг на Ејми Вајнхаус во емотивно интервју: Ме обвинуваат за нејзината смрт, товарот го носам 10 години