Денеска во првиот натпревар од четвртфиналето во СЕХА-Газпром лигата составот на Партизан убедливо со 39:24 го совлада Веспрем.

Овој резултат и висок триумф на српската екипа не е изненадувачки, бидејќи Унгарците во овој меч во Белград настапија со младинци и е прашање дали Веспрем, кој има пет титули во СЕХА, ќе игра и во иднина во ова регионално натпреварување.

Домаќините со серија од 5:0 стекнаа предност од „плус пет“ на семафорот од 9:4, а 10 минути подоцна беше и „плус седум“ (15:8), а до крајот на првиот дел веќе позитивата стана и „двоцифрена“ (21:11).

До крајот на средбата Србите само ја зголемуваа предноста и стигнаа до триумф од 15 голови разлика. Најефикасен во редовите на Партизан во денешната победа беше Зечевиќ со осум голови и шест асистенции.

А на спротивната страна Еклемовиќ беше прв стрелец со седум погодоци. Реванш средбата во Веспрем ќе се игра следната среда.