Фудбалерите на Баер Леверкузен и Холштајн Кил денеска одиграа нерешено 2:2, во натпреварот од шестото коло во Бундес лигата.

Баер поведе уште во четвртата минута со голот на Виктор Бонифас. Јонас Хофман четири минути подоцна го зголеми водството на германскиот шампион.

Кил во судиското надополнување (45+5`) намали на 2:1 со голот на Макс Гешвил. Јан-Фите Арп го постави конечниот резултат со гол од пенал во 69 минута.

Леверкузен е петти на табелата со 11 бодови, Кил е на 17 место и со денешното реми го освои вториот бод.

Фудбалерите на Унион Берлин ја победија Борусија Дортмунд со резултат 2:1. Головите за Унион ги постигнаа Кевин Фогт во 26 минута од пенал и Јорбе Вертесен во 45 минута. Стрелец на единствениот гол за Борусија Дортмунд во 62 минута беше Јулиан Рајерсон.

Унион е шести на табелата со 11 бодови, додека Борусија Дортмунд е на седмото место со 10.

Фудбалерите на Волфсбург во истиот период го победија Бохум со 3:1, додека Фрајбург го победи Вердер Бремен со 1:0.