Фудбалерите на Аргентина се првите кои обезбедија четвртфинале на „Копа Америка“. Актуелните светски шампиони и бранители на континенталната круна го совладаа Чиле со 1:0 на стадионот Мет Лајф во Њу Џерси.

Решавачкиот гол беше постигнат во 88 минута. По корнерот кој го изведе Меси, во шеснаесетникот на Чиле најдобро се снајде Лаутаро Мартинез кој од неколку метри го совлада голманот Браво за триумф на „гаучосите“.

Натпреварот помина во целосна доминација на Аргентинците. Имаа дури 21 удар кон противничкиот гол, сепак Меси и другарите до самиот финиш не успеаја да најдат пат до противничката мрежа.

Натпреварот го следеа повеќе од 80 илјади навивачи, а се подразбира дека повеќе од 90 отсто навиваа за Аргентина, од кои најголем број во дресови со број 10.

Во вториот натпревар од оваа група беше забележан исто така еден гол. Канада беше подобра од Перу со 1:0. На Перуанците, кои играа со играч помалку од 59 минута, откако беше исклучен Араухо, им пресуди Џонатан Давид, со гол во 74 минута. Натпреварот се одигра на стадионот во Канзас Сити.