Еден човек од Флорида неодамна им помогна на хирурзите да му отстранат тумор од мозокот свирејќи рок музика од 1980-тите и 90-тите.

Кристијан Нолен, професионален гитарист во заедницата Корал Гејблс во јужна Флорида, добил инструкции од лекарите да свири неколку песни на својата гитара додека бил подложен на будна краниотомија со цел да се извади тумор од десната страна на неговиот фронтален лобус, објави „WSVN“, пренесува „Гардијан“.

Операцијата на која бил подложен Нолен се изведува додека пациентот е буден за да се проценат и заштитат функциите на мозокот.

За време на неговата процедура во Центарот за рак на Универзитетот во Мајами на почетокот на јануари, Нолен свирел неколку песни од рок групите „Дефтонс“ и „Систем оф а Даун“.

„Тоа беше исто како да не сте од овој свет, се будите и луѓето активно работат внатре во вашата глава. Тоа е некако лудо чувство“, изјавил Нолен за „WSVN“.

На Нолен првпат му бил дијагностициран туморот откако доживеал симптоми кои ја зафатиле левата страна од неговото тело.

„Го изгубив чувството во целата моја лева страна. Од половината нагоре, не можев да ја движам раката, лицето почна да ми се развелкува“, изјавил Нолен. Тој исто така имал проблеми со свирењето на гитара и воопшто да ја користи левата рака.

На крајот, лекарите му дијагностицирале глиом – тумор во мозокот – на десниот фронтален лобус. Таа област на мозокот го контролира движењето и другите когнитивни способности, објави „Месинџер“ (Messenger).

Лекарите закажале операција за отстранување на туморот на Нолен 10 дена по првичната дијагноза. Целта на операцијата била да се потврди типот на туморот и да се отстрани што поголем дел од масата, а пред операцијата, лекарите го прашале дали би сакал да свири гитара за време на операцијата за да ја тестираат неговата умешност. Останатото е историја.