Продолжува Европско ракометно првенство во женска сениорска конкуренција со натпреварите од главната фаза, во групата „2“ репрезентацијата на Германија убедливо со 36:28 во СЦ „Борис Трајковски“ – Скопје триумфираше над селекцијата на Холандија.

Холанѓанките кои беа едни од ривалите на Македонија во прелиминарната фаза, направија еден чекор назад, а Германките еден чекор напред, поблиску до една од првите две позиции кои водат во полуфиналните борби на ЕП.

„Лалињата“ на стартот од првото полувреме го контролираа резултатот во своја корист, водеа минимално, со два, па и со три голови разлика во еден момент од мечот (7:4), и сите помислија дека ќе ја оправдаат фаворитската улога на овој меч, но не ја задржаа ваквата предност. Тоа го искористија нивните противнички кои не само што се вратија резултатски, туку и стекнаа убава позитива од „плус четири“ на паузата (13:17).

Се обидуваше со сите сили холандскиот состав да се врати, најмногу што можеа да направат е да ја анулираат негативата до „минус два“ (20:22), нешто подоцна беше и 24:27, но германските ракометарки не дозволија пресврт и на крајот дури славеа убедливо со осум голови разлика.

Во листата на стрелците во победничките редови доминираше Гријселс со осум голови, а истиот учинок на спротивната страна го имаше и Малестеин. На табелата моментно водат Франција и Црна Гора со по четири бодови, по два имаат Германија, Шпанија и Холандија, а Романија е последна без бодови.