Денеска и во реванш натпреварот од четвртфиналето во СЕХА Газпром лигата составот на Е. Пелистер загуби од Мешков Брест на гостински терен повторно со четири голови разлика, 35:31.

Битолчани на оваа возвратна пресметка за пласман на Фајнал фор турнирот во Задар (Хрватска) имаа за задача да ја анулираат негативата од првиот меч (31:27). Но, играчите на Жељко Бабиќ не успеаја во целта и на крајот мора да се помират со елиминацијата.

На почетокот од денешниот меч само двапати водеше македонската екипа двапати минимално со 1:2 и 3:4, а при нерешени 5:5 Белорусите направија серија од 6:0 која се покажа како клучна за крајниот епилог.

Највисоката позитива во првите 30 минути на домаќинот изнесуваше „плус осум“ (16:8).

Во следниот период Е. Пелистер ја намали негативата, во текот на целото второ полувреме достигнуваше до „минус два“ (19:17, 21:19, 24:22). За момент повторно Мешков се одвои на поголема предност (30:24), а до крајот само рутински завршуваше овој меч знаејќи тимот на Бабиќ тешко може против фаворитот да се направи некаков пресврт.

Прв стрелец во победничките редови беше Микита Ваилупау со 11 голови, а на спротивната страна по пет погодоци имаа Стипе Мандалиниќ и Немања Обрадовиќ.