Кошаркарите на Црвена звезда го совладаа составот на Виртус Болоња со резултат 94:79 во натпреварот од 31 коло во Евролигата. Видовме израмнето прво полувреме, екипите наизменично се менуваа во водство. Во Виртус доминираше Торнике Шенгелија за кого центрите на Звезда немаа решенија.

Милош Теодосиќ, со неколку фантастични асистенции и тројка на крајот од првото полувреме им донесе на белградските „црвено-бели“ предност од „плус шест“ (48:42).

Благодарение на Недовиќ, Звезда во третиот период стигна до „+10“ позитива, но гостите експресно направија кам-бек благодарение на незапирливиот Шенгелија. Со добра одбрана Звезда ја врати предноста и дојде до „+9“ водство 74:65 пред последните 10 минути.

Голема борба беше забележана во последниот дел. Звезда се мачеше во нападот, но со добра одбрана сепак ја сочуваше предноста и забележа победа по шест последователни порази во клупско елитното натпреварување.

Најдобри во редовите на црвено-белите беа Немања Недовиќ со 25 поени и Милош Теодосиќ со 11 поени и девет асистенции. Кај Виртус подобар од останатите беше Торнике Шенгелија со 25 поени.

Во следното коло Црвена звезда ќе му гостува на Реал Мадрид, додека Виртус го пречекува Панатинаикос. Српската екипа е на 16 место со 11 победи и 20 порази, а италијанскиот претставник е на осмата позиција со 17 победи и 14 порази.