Андреј Шошкиќ го понесе признанието за најдобар млад кошаркар во нашата земја за 2022-та година. Плејмејкерот на Работнички, на свои 17 години го доби признанието за најкорисен играч на завршниот турнир во М18 лигата што е второ вакво негово признание по ред. Тој и во 2021-та година беше прогласен за МВП, но тогаш во кадетска конкуренција со оглед на тоа што тој е роден 2005 година.

Шошкиќ пред камерите на „Утрински печат“ истакна дека признанието „најдобар млад кошаркар“ е чест и привилегија, тежина, но и дополнителна мотивација за периодот кој следува.

– Среќен сум за ваквото признание, ова за мене е поттик повеќе да продолжам да се надградувам и подобрувам на својата позиција. Иако сум млад, не сум човек на кој му недостасува ноќниот живот, се дружам постојано со другарите, но мој приоритет е кошарката, изјави Андреј.

Кошаркарот на Работнички воедно потенцираше дека најголемата поддршка ја добива од неговото семејство, трудејќи се секогаш да го даде најдоброто од себе.

– Пред секој натпревар размислувам за кого играм, а тоа е моето семејство, кое секогаш е присутно на трибините. Мојата цел е да продолжам да градам врвна форма и да бидам најдобрата верзија од себе, се разбира и освојување на шампионска титула со Работнички, потенцираше Шокиќ.

Да се биде најдобар значи да се биде дисциплиниран и постојано расположен за тренинзи и физички подготовки. Без ваков пристап нема резултати, ниту пак борба во конкуренцијата за најпреспективни играчи во Македонија.

-Немам притисок, дури и да направам грешка знам дека во следниот натпревар ќе ја поправам. Речиси секој ден имаме по два тренинзи, а често сум и во теретана, знам дека само со напорна работа можам да постигнам големи резултати, истакна младиот кошаркар.

Целото интервју со Андреј Шошкиќ можете да го проследите на следното видео: