Сон Хеунг Мин и официјално започнува ново поглавје во својата фудбалска кариера, јужнокорејската ѕвезда се сели во редовите на Лос Анџелес ФК, објави клубот од МЛС лигата.

По десет години верност кон Тотенхем, Сон минатата недела емотивно се збогуваше со англискиот тим. На пријателскиот натпревар против Њукасл во Сеул, во родната Јужна Кореја, тој го напушти теренот во солзи, додека публиката го поздравуваше со громогласни овации.

„Многу сум горд што се приклучувам на Лос Анџелес кој е клуб со големи амбиции. Станува збор за клуб со богата историја и тука сум да помогнам да испишуваме нова историја. Возбуден сум за овој нов период. Доаѓам тука за да освојувам трофеи и да дадам се од себе за овој клуб, градот и навивачите. Со нетрпение чекам да излезам на теренот“, изјави Сон.

Во текот на децениската кариера во Премиер лигата, напаѓачот постигна 173 погодоци и запиша 101 асистенција. Врвот го достигна во сезоната 2021/2022, кога ја освои „Златната копачка“ како најдобар стрелец во англиското првенство.