Пратениците од ВМРО-ДПМНЕ продолжуваат со неодговорно, деструктивно дејствување, на штета на граѓаните и на државата. Свесно и намерно, пратениците на ВМРО-ДПМНЕ со месеци кочат важни законски решенија, изјави пратеникот од СДСМ Диме Велковски.

-Поради нивната деструктивност и неодговорност закочена е постапката за изградба на нов Клинички центар во Скопје, најважен капитален проект за македонското здравство. ВМРО-ДПМНЕ го кочи и законот со кој ќе се унапреди енергетската ефикасност, со кој детски градинки, училишта и болници треба да добијат енергетски ефикасни фасади и нови, еколошки системи за греење. Како што претходно беа против зголемување на минималната плата, како што се противеа на раст на пензиите, денес пратениците на ВМРО-ДПМНЕ се против тоа парите да завршуваат кај граѓаните и во македонската економија. Како никаде во светот, опозициската партија се противи на законско решение со кое главниот град добива нов ефикасен и еколошки јавен транспорт, рече Велковски.

Според него ВМРО-ДПМНЕ е против унапредување на земјоделството и изградба на три големи откупни центри и овие блокади се доказ за тоа до каде оди деструктивноста на ВМРО-ДПМНЕ и нивните пратеници.

-Граѓаните, јавноста, го гледаат таквиот антинароден и антидржавен однос на опозициската партија и затоа им следи нов изборен пораз веќе на локалните избори. Тоа, очигледно го знаат и во белиот дворец па затоа уште сега бараат алиби. Наместо блокади и деструкции, пратениците на ВМРО-ДПМНЕ имаат шанса да застанат зад граѓаните и нивните интереси.Со или без ВМРО-ДПМНЕ; реформите во интерес на граѓаните и државата, продолжуваат. Како парламентарно мнозинство ќе најдеме начин да се реализираат сите предвидени мерки и политики во интерес на граѓаните, рече пратеникот Велковски.