Двата најдобри македонски ракометни тима, Вардар 1961 и Еурофарм Пелистер, денеска од 20 часот во салата „Билјанини извори“ во Охрид ќе ја имаат првата пресметка во новата сезона, ќе играат во Суперкупот на Македонија.

Вардар 1961 во новата сезона влегува како освојувач на двојната круна, но поради суспензијата од Европската ракометна федерација и забраната за настап во Лигата на шампионите, екипата е видоизменета. Странските ракометари што требаше да ја засилат екипата, не дојдоа во Скопје, па тренерот Владо Недановски ќе се потпре на македонските ракометари, а од странците ќе може да смета само на староседелците, Јоел Куни Моралес, Дарко Ѓукиќ, Јан Чувара и Анте Гаџа кој сè уште е повреден.

Минатата година двете екипи исто така играа во Суперкупот и славеше Еурофарм Пелистер со 31:22.

– Ова ќе ни биде прв натпревар против Е. Пелистер сезонава и очекувам возбудлив дуел. Противникот е засилен и сигурно дека ќе сакаат да триумфираат во Суперкупот. Но, ние сме Вардар и ќе одиме на победа – вели голманот на „црвено-црните“ Мартин Томовски.

Битолчани во новата сезона влегуваат со големи амбиции, екипата ја води нов тренер, Ларс Валтер, а „странската постава“ од минатата година е сменета со нова и резултатите веќе се видливи. Е. Пелистер во своето прво учество во завршниот турнир на СЕХА лигата што минатиот викенд се одржа во Задар, Хрватска, го освои третото место.

– Секако дека посакуваме победа, но нема да биде лесно бидејќи Вардар е шампион. Очекувам да одиграме без притисок и да уживаме во натпреварот и да им приредиме спектакл на ракометните навивачи. Одигравме доста квалитетни натпревари досега, настапивме на завршниот турнир во СЕХА лигата, задоволни сме од постигнатите резултати, но сметам дека се уште имаме простор за напредок – смета македонскиот репрезентативец и член на Е. Пелистер, Гоце Ојлевски.

Правдата на пресметката меѓу двата најдобри македонски клуба ќе ја дели најдобрата судиска двојка, Ѓорѓи Начевски и Славе Николов.