В недела ќе се чисти центарот на Скопје
Иницијативата „За почиста Македонија“ в недела организира акција за чистење на центарот на Скопје.
– По текот на улицата од „Холидеј ин“ до Олимписки базен, на целиот паркинг спроти „Холидеј ин“ и по тесните сокаци меѓу старите куќи во Ново Маало, е преполно со шишиња пиво, хартии, догорчиња и амбалажа. Да затегнеме ракавици, да заигра некоја метла и со многу малку труд за неполни 2 часа ова место повторно ќе заблеска, а и ќе инспирираме и нови луѓе да ни се приклучат на следните акции, заедно кревајќи ја општата свест за преземање акција кон почиста иднина – велат организаторите на акцијата.
Од Иницијативата информираат дека збирното место на сите заинтересирани што сакаат да учествуваат во акцијата е на паркингот кај „Холидеј ин“ на улицата Мирче Ацев, во 17.30 часот.
– Ние носиме музика, добри вибрации, ќеси, ракавици и нови пријатели. Вие понесете желба за промена. За почиста Македонија! – велат организаторите.
Акцијата е организирана како дел од проектот „Еко турнеја – Македонија“ и е финансиран од Фондацијата Отворено општество.