Европската фудбалска федерација денеска прво демантира дека Светската здравствена организација побарала да го суспендира фудбалот на 18 месеци, но исто така и го призна поразот во поглед на инсистирањето националните првенства да се одиграат до крајот.

УЕФА вчера на официјалниот сајт објави соопштение во кое бара домашните првенства задолжително да се одиграат до крајот, но денеска таа одлука е „преработена“ и во неа е имплементирана нова ставка.

„Даваме силни препораки домашните првенства и купови да се одиграат до крај иако е разбирливо дека ќе има посебни случаи. Поради тоа УЕФА моментно потготвува препораки кои се поврзани за екипите кои треба да играат во европските купови од земјите во кои нема да може да се доиграат првенствата до крај“, стои во новото соопштение.

Со ова соопштение УЕФА го призна поразот по одлуката на холандската влада да го суспендира спортот до септември поради пандемијата на коронавирусот.