Четиринаесет работници на еден од главните шпански аеродроми се уапсени под сомнение дека краделе предмети од чекираниот багаж, соопшти полицијата во петокот.

Полицијата заплени наводни украдени предмети во вредност од речиси 2 милиони евра, вклучително и околу 13.000 евра во готовина, од групата вработени на најголемиот аеродром во Тенерифе, на шпанските Канарски Острови, се вели во соопштението. За истиот случај под истрага се уште 20 вработени на аеродромот, пренесува АП.

Аеродромот Тенерифе Југ опслужува околу 11 милиони патници годишно, од кои повеќето европски туристи кои ја бараат пријатната клима на островите во близина на брегот на северозападна Африка.

Истрагата започна по зголемените поплаки на патниците за предмети што недостасуваат од нивниот багаж, се вели во полициското соопштение.

Кражбите се случиле додека багажот бил ставен во просторот на авионот, соопшти полицијата. Во складиштето, наводните крадци насилно отвориле куфери, ваделе вредни предмети и повторно ги затвориле.

Властите заплениле 29 луксузни рачни часовници, 120 парчиња накит, 22 мобилни телефони од високата класа и различни електронски уреди. Осомничените продале многу други предмети преку интернет или во локални продавници, верува полицијата.