Младата фудбалска репрезентација на Македонија до 21 година денеска во Јенчепинг ќе го има официјалниот тренинг пред утрешниот прв меч од квалификациите за пласман на ЕП во Словачка 2025 година. Во рамките на првото коло од групата „Ц“, репрезентацијата на Македонија предводена од селекторот Драги Канатларовски утре од 18.00 часот ќе игра против Шведска.

Членот на младата селекција, Стефан Деспотовски ги сподели своите очекувања пред самиот старт на квалификациите:

– Одигравме многу натпревари заедно во подготвителниот период. Имавме простор и време да се запознаеме многу подобро меѓусебно. Го искористивме овој период максимално за да се подобриме, во континуитет растеме и напредуваме и на тактички и на технички план. Подготвени сме за предизвиците што не очекуваат на самиот стар од квалификациите. Долго време го очекувавме и се напорно се подготвувавме за овој момент. Сега е време да покажеме на овие квалификации дека поседуваме голем квалитет. Очекувањата се големи, сакаме да одиграме добри квалификации и да обезбедиме добар пласман. Сигурен сум дека секој од нас ќе го даде максимумот, за да ги оствариме зацртаните цели. Сите заедно ќе се бориме до крај за да оствариме голем успех – рече Деспотовски.

На 12 септември играчите предводени од Драги Канатларовски во Скопје ќе го имаат и вториот квалификациски меч против Холандија.

– На самиот старт од квалификациите играме со многу силни селекции. Добро ги знаеме нашите предности и ќе гледаме да ги искористиме на најдобар можен начин, верувам дека тоа е единствениот начин за остварување на позитивен резултат. Одиме чекор по чекор, моментално сме фокусирани на првиот меч и дуелот со Шведска. Имаме репрезентација која може да им парира на насилните европски селекции. Има одлична атмосфера, комуникација и поддршка помеѓу нас фудбалерите, се тоа што е потребно за создавање на победнички менталитет. Сакам да ја нагласам и одличната соработка што ја имаме со селекторот и неговиот стручен тим. Ги слушаме нивните совети, кои се добронамерни и кои може само да ни помогнат да станеме подобра и поквалитетна репрезентација – вели фудбалерот на Работнички.

Веќе почнаа натпреварите од квалификациската група „Ц“, Шведска, Молдавија и Грузија стартуваа со триумф и сите имаат по три бодови, Македонија и Холандија своите први мечеви ќе ги имаат в петок, а Гибралтар кој загуби трипати моментно е без бодови.