Хрватската царина со повеќе од 2.600 вработени, секојдневно се соочува со сериозни предизвици во заштитата на хрватските и надворешните граници на Европската унија.

Кога станува збор за најчесто шверцувана стока, директорот на Царинската управа, Марио Демировиќ, посочува дека тоа е ситно сечениот тутун, пренесува Индекс.

„Фокусот е на заплените на ситно сечен, односно суров тутун. Секоја година одземаме најмалку 20 тони, а само оваа година веќе имаме повеќе од 15 тони запленет материјал“, изјави Демировиќ.

Според него, за разлика од изминатите години, трговијата со цигари денес е далеку помал проблем.

„Не е дека не постои, но веќе не е толку значаен како пред десет години. Хрватска претежно функционира како транзитна рута, додека финалната дестинација на оваа стока најчесто е Западна Европа,“ нагласи тој.

Демировиќ појасни дека зад шверцот стојат меѓународни криминални мрежи со високо развиени методи на работа.

„Ова е високо софистициран организиран криминал. Појавите на саеми и пазари се само периферен дел од проблемот. Нашата главна цел е да дејствуваме против криминалните групи на меѓународно ниво, бидејќи без соработка со другите држави немаше да можеме да постигнеме значајни резултати,“ рече директорот.