Турист бил непријатно изненаден откако добил сметка во ресторан на езерото Комо. Имено, му наплатиле две евра повеќе, бидејќи сендвичот што го нарачал му бил пресечен на половина, пишува „Њујорк пост“.

Неименуваниот маж, кој престојувал во регионот на езерото Комо во близина на Милано, нарачал вегетаријански сендвич со помфрит во барот „Паче“. Откако го изел, се шокирал кога открил несакано зголемување на цената на неговата сметка.

Тој ја подмирил сметката без да се пожали на персоналот, но подоцна објавил негативна рецензија на веб страната „TripAdvisor“.

Незадоволниот гостин објаснил дека нарачал сендвичот да го сподели со пријател, но не побарал од вработените во ресторанот  да го пресечат на половина.

„Неверојатно, но вистинито“, напишал човекот покрај фотографијата на сметката на TripAdvisor.

На него се гледа дека цената на еден сендвич е 7,50 евра, Кока Кола чини 3,50 евра, водата 1,50 евро и еспресото 1,20 евра, а тука е и спорниот ‘diviso da meta’, односно такса за сечење сендвич, која изнесува 2 евра.

По непријатната ситуација човекот му дал на ресторанот една ѕвезда на „TripAdvisor“, што е далеку од просечните четири и пол ѕвезди, врз основа на повеќе од 100 прегледи.

Набрзо и сопственичката на ресторанот се огласила и се бранела околу прашањето за спорната такса.

„Дополнителните барања имаат цена“, изјавила сопственичката Кристина Бјаки за италијанскиот весник „Ла Република“.

„Моравме да користиме две чинии наместо една и времето за миење се дуплира, а пдополнително беа потребни и две подлоги. Не беше обичен тост сендвич, внатре имаше помфрит. Ни требаше време да го преполовиме“, додала таа.

Таа, исто така, истакнала дека клиентот не се пожалил за наплатата и појаснила дека ќе ја отстранела наплатата од сметката доколку имало забелешки.

Откако приказната за неочекуваната такса за услугата стана вирална, од веб-страницата биле принудени да ги паузираат прегледите за местото, кое беше критикуван.