Кошаркарската репрезентација на Македонија не успеа да обезбеди пласман на Европското првенство 2022 година, но селекторот Александар Тодоров гледа добри работи кои влеваат надеж во иднина. Репрезентацијата во Ненад Димитријевиќ доби нов лидер за наредните 10-тина години, а тука се и младите Симиќ, Савиќевиќ…
Тодоров смета дека Македонија сигурно ќе обезбеди пласман на наредниот Евробаскет кој ќе се игра за четири години.

– Чувствата се измешани, не успеавме да се пласираме на Европското првенство, но има и причина за задоволство. Посебно од аспект на доведување на нови лица во репрезентацијата, како и начинот на кој игравме на двата натпревари против Италија и оној против Естонија. Нема што да се прави, продолжуваме понатаму. Јас сум оптимист затоа што во иднина сите кошаркари кои сега имаат 17-18 години ќе бидат поискусни и верувам дека со помошта на поискусните играчи Македонија нема да има проблем да се пласира на наредното Европско првенство. Репрезентацијата горе-долу е таа – смета Тодоров.