Тинејџерка која наводно била нападната од иранската полиција за морал затоа што не носела шамија, починала, објавија државните медиуми. 16-годишната Армита Гераванд се здобила со „тешки повреди“ по расправија со таканаречената полиција за морал во станицата Шохада во главниот град Техеран на 1 октомври, според групата за човекови права Хенгав.

Хенгав објави дека Гераванд била извлечена од воз, а инцидентот бил снимен на камера. Нејзиниот случај е спореден со оној на Махса Амини, 22-годишната која почина додека беше во полициски притвор минатата година, што предизвика протести низ целата земја и светот.

Иранските медиуми неодамна објавија дека Гераванд е мртва. Се појавија и фотографии на кои се гледа како 16-годишното девојче лежи во кревет во болницата Фајр. Има извештаи дека на нејзините родители им е забрането да објавуваат какви било нејзини слики на социјалните мрежи по инцидентот или да зборуваат со групите за човекови права за тоа што се случило.

Во видео споделено од државната новинска агенција ИРНА, родителите на девојчето рекле дека на нивната ќерка ѝ паднал крвниот притисок и затоа таа изгубила рамнотежа удирајќи си ја главата. Активистите за човекови права сметаат дека контроверзната изјава е дадена под притисок. Тие побарале да се објават снимките од возот, пишува британски Скај.

Се чини дека видео клипот споделен од државните медиуми прикажува тинејџерка како оди кон возот со две пријателки. По некое време, една од девојките е извлечена од полицајците. Масуд Дорости, шеф на оперативната компанија за метрото во Техеран, рече дека снимката не покажува знаци на конфликт.