Огромниот интерес на читателите за мемоарите на британскиот принц Хари (38) го принуди издавачот од Париз „Fayard“ да отпечати дополнителни 130.000 примероци само два дена откако во вторникот се појавија на полиците.

Тие дополнителни 130.000 примероци следеа по „првото печатење од 210.000 примероци“, рекол портпаролот на „Fayard“. Тој додал дека, во зависност од нарачките, ќе мора да се испечатат нови.

Новите нарачки за книгата „Резерва“ (Spare), а која во Франција се продава под наслов „Le Suppléant“, засега се 20 отсто повисоки од првото печатење на мемоарите на поранешниот американски претседател Барак Обама, кои беа блокбастер кога беа објавени во 2020 година.

Во автобиографската книга, Хари открива сè за себе, вклучувајќи го и фактот дека го молел својот татко да не се венча со Камила, која сега е кралица на Обединетото Кралство. Книгата изобилува и со пикантерии од животот на кралското семејство. Хари опишал како неговиот постар брат, принцот Вилијам (40), физички го нападнал за време на расправија во врска со Меган Маркл.

Издавачот „Penguin Random House“ изјави претходно оваа недела дека мемоарите на Хари веќе првиот ден го собориле рекордот со повеќе од 1,4 милиони продадени примероци во САД, Канада и Обединетото Кралство.

Британскиот крал Чарлс Трети и неговиот син Вилијам во четвртокот првпат се појавија во јавност по објавувањето на мемоарите на принцот Хари и неговите телевизиски интервјуа во кои тој изнесе низа обвинувања на сметка на британското кралско семејство, но тие не дадоа никаков коментар за тоа.

Во Минхен, портпаролката на издавачот „Penguin Random House“ изјави дека тие почнале да печатат и дополнителни примероци на германски на денот на објавувањето на книгата.

Кој е Џ.Р. Мохрингер, писателот во сенка на книгата на принцот Хари и добитник на Пулицерова награда?

Утре излегува „Резерва“: Сите скандали кои принцот Хари ги откри досега

Со голи раце ископал гроб: Принцот Хари во мемоарите напиша за спонтаниот абортус на Меган