Во кафе-книжарницата „Буква“, на 22 април, со почеток во 21 часот, ќе се одржи петтото издание на поетската вечер „Поетска епизода“ во организација на младинското неформално здружение за култура „Култура Бета“, а со поддршка на „Јуроп хаус“.

Во оваа епизода гостуваат поетите и поетесите Ана Димишковска, Владимир Мартиновски, Ѓоко Здравески, Дејан Трајкоски и Марија Хана Трајкоска. Вечерта ќе ја модерираат младите поети Андреј Медиќ Лазаревски и Марија Велинова.

Петтата епизода е посветена на поетиката на питорескното што како тема ги опфаќа поезијата посветена на ликовни дела, поезија за филмови, визуелната поезија, поезија за бои и сето она што може да влезе помеѓу.

Епизодата е поддржана од „Јуроп хаус“, која го препозна значењето на овие поетски вечери како едно од местата за промоција на младинска, современа, македонска поезија.

Младинското здружение за креативно и културно изразување „Култура Бета“ е неформална организација за сите млади кои имаат идеи за развој на културата надвор од културните институции. Воочувајќи ја малата развиеност на младинската слободна и неформална култура, неколкумина млади одлучија да се организираат во отворено друштво, чија цел е остварување на најразлични културни случувања меѓу младите.