Тело на млад Сириец било пронајдено во Полска во близина на границата со Белорусија, соопшти денес полската полиција, во услови на зголемени меѓународни тензии поради мигрантската криза за која ЕУ вели дека е организирана од Минск, пренесува АП.

Илјадници мигранти од Блискиот Исток во студени услови се кријат во шумите меѓу Белорусија и земјите-членки на ЕУ Полска и Литванија, кои не им дозволуваат да поминат.

Веќе има мртви, а постои и страв за безбедноста на другите како што се наближуваат зимските услови.

„Вчера телото на млад Сириец беше пронајдено во шумата во близина на границата, до Волка Теречовска“, објави полската полиција на Твитер.

Полицијата соопшти дека не може веднаш да ја утврди причината за смртта на местото на настанот.

Телото е пронајдено во деновите на зголемени меѓународни тензии поради мигрантската криза, а соседите на Белорусија предупредуваат дека ситуацијата може да ескалира во воен конфликт. Загриженост изрази и американскиот претседател Џо Бајден.

Рускиот претседател Владимир Путин, најважниот сојузник на белорускиот претседател Александар Лукашенко, изјави дека Русија нема никаква врска со мигрантската криза.

Полската гранична полиција во саботата соопшти дека во текот на ноќта белоруски војници урнале дел од привремената ограда што Полска ја подигнала за да ги одврати мигрантите.

ВИДЕО | Хаос со мигрантите на границата со ЕУ: Белорусија „сака да предизвика инциденти со жртви“

Хуманитарна катастрофа: Играта со мигрантите на Лукашенко му се врати како бумеранг