Како дополнителна програма во рамки на јубилејното 45. издание на манифестацијата „Скопско лето“, на 23 јули (вторник), со почеток во 20:30 часот, во Сули ан ќе се одигра театарската претстава „Веселинови“. Претставата е комедија во продукција на Драмско студио „Бронзена наметка“ – Штип.

Во претставата играат Оле Поцкова како Весела и Игор Стојанов-Баркли како Веселко, а со интерпретација на песна учествува и Нела Гегова. Претставата е авторски проект на Трајче Кацаров.

Весела и Веселко не се надвор од аглите и замките што ги поставува семејниот живот. Повеќе се противречни отколку категорични. Се плашат како деца и си играат како деца. Не ретко тонат во проблеми што извираат од плитките џепови, оддалеченоста од децата, од ноктите на државните грабливци. Плачливи се и тврдокорни. Напати се мили, напати се неподносливи. И во двата случаја се интересни, стои во драматуршкиот опис на претставата.

Својата премиерна изведба претставата ја имаше пред два месеца на сцената во НУ Центар за култура „Ацо Шопов“ во Штип.