Николас Пуч, внук на основачот на „Ермес“, се проценува дека „тежи“ 10 милијарди евра.  Тој е самец и нема деца, а сега неговиот план е да напише тестамент и да го подели своето огромно богатство со својот поранешен градинар.

Пуч, 80-годишниот Французин и главен акционер на „Ермес“, сега сака да го посвои својот поранешен вработен за да може да го именува за негов наследник. Се верува дека Пуч има помеѓу 5 и 6 отсто од луксузниот француски бренд за кожа „Ермес“ бидејќи е внук на основачот на брендот.

Тој сака да го прераспредели своето богатство на поранешниот градинар и мајстор, 51-годишник од скромно мароканско семејство, пренесува „Еуроњус“ (Euronews).

Според магазинот „Билан“ (BIlan), кој годишно ги рангира 300-те најбогати поединци во Швајцарија, неговото богатство се проценува на меѓу 9 и 10 милијарди швајцарски франци или меѓу 9,4 и 10,4 милијарди евра.

Пуч живее во Вале, Швајцарија и наводно веќе презел чекори за реновирање на неговиот имот и ангажирал адвокати кои ќе му помогнат во процесот на посвојување. Иако не е невозможно да се посвои возрасно лице во Швајцарија, постапката сепак е комплицирана и е опишана како „необичен потфат“.

Компликации се појавија и поради веќе постоечкиот договор за наследство што Пуч го потпиша со фондацијата Исократ со седиште во Женева во 2011 година. Фондацијата призна дека дури сега биле свесни за желбата на Пуч да го откаже договорот и рекоа дека не знаат за какви било алтернативни аранжмани.