Канонизацијата на Карло Акутис, тинејџер кого многумина го нарекуваат првиот католички светец на дигиталното доба, ќе се одржи на 7 септември, објави папата Лав XIV во петокот. Иако Акутис требаше да биде прогласен за светец на 27 април, настанот беше одложен поради смртта на папата Франциск. Новиот датум го објави самиот Лав за време на состанокот со кардиналите, каде што биле дискутирани причините за светоста.

Покојното момче, кое почина од леукемија во 2006 година на 15-годишна возраст, користеше компјутерски вештини за ширење на верата и до неговата смрт управуваше со веб-страниците на Миланската епархија, а подоцна и на Ватиканската академија. Веќе прогласен за благословен од Католичката црква во 2020 година и „Божји инфлуенсер“ или „кибер апостол“, Акутис го помина поголемиот дел од својот краток живот ширејќи ја католичката вера на Интернет. Сега тој привлекува нови генерации аџии на своето почивалиште.

Непосредно пред неговата смрт го заврши развојот на веб-страницата за следење на локациите на пријавените католички чуда низ целиот свет.

Роден е во Лондон на 3 мај 1991 година, неговите родители се Италијанци и тој пораснал во Милано. Празниците ги поминал во вториот дом на семејството во Асизи, а починал во Монца во Северна Италија. Неговото семејство е богато и не било религиозно, но тој бил посветен на верата уште од младоста.

Секој ден одел на миса, а неговата мајка Антонија Салцано Акутис го опишува како „добро воспитано и великодушно момче“ кое „ги делело сите свои играчки – секогаш со насмевка“.

„Чувствував дека е посебно и необично момче“, изјави Салцано Акутис за АФП во градината на фондацијата посветена на нејзиниот син на планината над Асизи.

На само девет години, Карло им помагал на бездомниците на улиците и им носел храна.

-Тој велеше: „Јас имам сè, овие луѓе немаат ништо, дали е тоа фер? – откри неговата мајка.

Имал талент за компјутери, ги сакал видеоигрите и ги ширел учењата на Исус Христос на Интернет. Неговата мајка рекла дека купил „плејстејшн“ кога имал осум години, но се ограничил на еден час играње игри неделно; бил претпазлив, сфаќајќи дека сè подолго од тоа може да стане зависност.

„Живееме во комплексно општество каде што технологијата понекогаш се чини дека апсорбира сè“, рече Салзано Акутис. „Зошто Карло е знак на надеж? Бидејќи помина низ сето тоа недопрен, тој покажа дека мора да бидеме мајстори на тие работи и пред сè ги користеше за да прави добро“, рече таа.

Две чуда поврзани со момчето

Ватикан призна две чуда поврзани со Акутис, а според католичките правила, тие се предуслов за негова канонизација. Првото чудо му се припишува во 2020 година, кога се вели дека во 2013 година посмртно посредувал во лекувањето на бразилско момче кое страдало од ретка болест на панкреасот.

Минатата година, припишано му е и оздравувањето на студентка од Костарика која била сериозно повреден во несреќа, па затоа неговиот гроб привлекува голем број аџии и љубопитни посетители.

Бискупот од Асизи, автор на книгата за врските меѓу Акутис, Свети Франциск и Света Клара Асишка, една од неговите први следбеници, рече дека се надева дека неговата канонизација ќе привлече нови верници.