Сушата во Бразил откри антички карпести резби на човечки лица
Падот на нивото на водата на Амазон откри резби од карпи кои главно биле потопени откако биле издлабени пред повеќе од илјада години. Тешката суша значи дека сега лесно може да се забележат човечките лица издлабени во карпите на брегот.
Некои од нив биле забележани за време на претходна суша, но археолозите велат дека овој пат успеале да лоцираат поголема разновидност на резбите. Откритието е направено во градот Манаус, во северен Бразил, пренесува Би-Би-Си.
Тие се наоѓаат на делот од брегот познат како Понта дас Лајес, во близина на местото каде што Рио Негро и реката Солимес се влеваат во Амазон.
Археологот Хаиме Оливеира изјави за локалните медиуми дека тие биле издлабени од луѓе кои живееле во областа во предколумбиско време.
„Овој регион е предколонијално место кое има докази за окупација што датира од пред околу 1.000 до 2.000 години. Она што го гледаме овде се претстави на антропоморфни фигури.“, рече тој.
Друга карпа има жлебови за кои се смета дека домородните луѓе во областа ги користеле за да ги острат своите стрели. Резбите последен пат биле видени во 2010 година, кога нивото на водата на Рио Негро паднала на 13,63 метри. Во неделата, нивото на реката првпат се спушти на под 13 метри, а во понеделникот падна уште повеќе, односно на 12,89 метри.
Бразилската влада ја припишува сушата на климатските промени и временскиот феномен Ел Нињо, што предизвика обемот на врнежи во северниот дел на Амазон да падне под историскиот просек и нивото на реките да се спушти на речиси рекордно ниво.