Тинејџерите кои подлегнуваат на притисокот од врсниците и почнуваат да пушат веројатно го прават тоа затоа што имаат помалку сива мозочна маса која влијае на донесувањето одлуки и почитувањето на правилата.

Младите луѓе кои развиваат навика за пушење имаат тенденција да доживеат намалување на сивата мозочна маса што го контролира управувањето со задоволството до крајот на тинејџерските години.

Барем тоа е произлегува од студијата за влијанието на пушењето врз адолесцентите и младите во Велика Британија, Франција, Германија и Ирска, спроведена од универзитетите Кембриџ, Фудан и Ворвик, а резултатите беа објавени во вторникот во списанието „Нејчр комуникејшнс“ (Nature Communications).

Откако ги споредиле резултатите од снимањето на мозокот на учесниците кои почнале да пушат на 14-годишна возраст со оние кои не пушеле, и ја повториле постапката за истите учесници на возраст од 19 и 23 години, тие откриле дека „во просек, тинејџерите кои почнале да пушат од 14-годишна возраст имаат значително помалку сива материја во делот на левиот фронтален лобус кој е поврзан со донесувањето одлуки и кршењето на правила“.

Сивата материја, ткивото што ги обработува информациите и ги содржи сите неврони на органот, го достигнува својот врв пред адолесценцијата, иако целокупниот развој на мозокот продолжува до зрелоста.

Тимот научници, исто така, откри дека луѓето кои почнале да пушат на 14-годишна возраст имале „губење на сивата материја во десниот префронтален кортекс“, кој исто така е дел од мозокот поврзан со тешко пиење и употреба на марихуана.

„Помалку сива материја во овој дел од мозокот може да ја ограничи когнитивната функција, што доведува до помала самоконтрола и склоност кон ризични однесувања, како што е пушењето“, рекла Барбара Сахакијан од Одделот за психијатрија на Универзитетот Кембриџ.