Страста број еден на Кирјос не е тенисот, тој ќе стане газда на кошаркарски клуб
Тенисерот има голема љубов кон кошарката, па најверојатно ќе стане дел од сопственичката структура на клубот Југоисточен Мелбурн Феникс, заедно со НБА-ѕвездата Џон Вол и уште неколкумина
Тенисерот Ник Кирјос е во завршни разговори да стане косопственик на кошаркарски тим во неговата родна Австралија, здружувајќи се со сегашни и поранешни НБА ѕвезди како дел од конзорциум.
Австралиската ѕвезда е голем љубител на кошарката и редовно посетува натпревари кога му дозволува тенискиот распоред. Наводно, минатогодишниот финалист на Вимблдон е во преговори за преземање на НБЛ тимот Југоисточен Мелбурн Феникс.
НБА-ѕвездата на Лос Анџелес клиперс, Џон Вол, исто така е дел од конзорциумот предводен од американскиот претприемач Роми Чаудари. Кирјос ќе се приклучи на сопственичката група предводена од Чаудари, која ги вклучува Вол, Зак Рендолф, Ал Харингтон, Џош Чајлдрес и Данте Ексум.
Кирјос е голем навивач на Бостон селтикс и кога неговиот НБА-миленик е поразен и тој губи тениски мечеви поради нервоза.
– Ако некој игра со мене и знае дека Селтикс изгубиле, тоа е негова шанса. Тоа е сигурно најдобра шанса да ме победите, да играте со мене тој ден – ја опишува Кирјос својата навивачка страст.
