Летниот период е најпосакуваното време за организирање концерти на отворено. Пандемијата на коронавирусот на многумина им го промени плановите, но не им го украде оптимизмот да го работат тоа што најдобро знаат да го прават.

Пи-арот на „Авалон продукција“ изминативе неколку месеци најавуваше, одложуваше, но и реализираше повеќе концерти. Стресната ситуација што ја создаде короната воопшто не ги загрози насмевката, шармот и ведрината на Ивана Нолчева.

Поранешната новинарка, а неколку години наназад пи-ар на „Авалон“, последниов период постојано е во движење на релација Скопје – Охрид – Битола – Скопје, зависно од тоа каде продукцијата организира концерти.Постојано е насмеана, секогаш е коректна и искрена, а шармот што зрачи од нејзиниот стил на облекување им влева оптимизам на сите што ќе се најдат во нејзина близина. Ивана е вистински пример како треба да се однесуваме во животот, и во убавите и во тешките времиња.