Станковски и официјално нов фудбалер на Газиантеп
Еден од најталентираните македонски фудбалери и досегашен член на Работнички, Лука Станковски, направи трансфер во турскиот прволигаш Газиантеп. Тој потпиша договор на четири и пол години со прволигаш.
– Внимателно го следиме Станковски извесен период. Тој е прикажан како еден од фудбалерите со најголем потенцијал познат во својата земја и во Европа. Среќни сме што ангажиравме еден толку важен млад талент во нашиот клуб. За овој трансфер нашите менаџери заминаа во Македонија да преговараат со семејството и со клубот. Мислам дека направивме многу важен трансфер кој ќе биде корисен за нас. Му посакуваме добродојде на Лука и му посакуваме успех – изјави Џевдет Акинал, претседателот на Газиантеп.
Станковски можеше уште минатото лето да ги напути „романтичарите“ бидејќи ги договори сите услови со италијанскиот второлигаш Монца, но трансферот во последен момент пропадна и остана во Работнички. И управата на Работнички е задоволна од условите кои ги понуди турскиот тим.
– Среќни сме што можеме да го потврдиме трансферот на нашиот досегашен фудбалер, талентираниот Лука Станковски во турскиот прволигаш Газијантеп. Работнички продолжува да реализира големи трансфери на своите фудбалери и во овој тежок период на пандемија на коронавирусот низ целиот свет. Имаше неколку понуди за Лука Станковски, но раководството на Газијантеп беше најупорно, понуди одлични услови и за клубот и за самиот фудбалер, а заеднички донесовме одлука дека тоа е вистинскиот клуб за Лука да продолжи да напредува и да се развива. Му посакуваме многу среќа, да се наметне со своите игри и во Газијантеп и да го следи примерот на неговите поранешни соиграчи и членови на Работнички, Елиф Елмас и Милан Ристовски, кои сега се стандардни членови на сениорската фудбалска репрезентација на Македонија. Со својот квалитет и Лука Станковски го заслужува токму тоа и веруваме дека многу брзо ќе го оствари –изјави претседателот на ФК Работнички, Драган Поповски.