Членот на одбојкарската репрезентација на Србија која минатата година триумфираше на Европското првенство е позитивен на коронавирус. Поради лесната клиничка слика Атанасијевиќ не е задржан во бoлница, туку е пратен на домашно лекување.

– Позитивен сум на коронарус, се уште не знам каде го добив. Постојано се преслушувам со кого сум бил во контакт. Се надевам дека на никого не сум му го пренел вирусот – изјави Атанасијевиќ за српските медиуми.

Одбојкарот неодамна се врати од Перуџа каде долго време беше во карантин, а пред еден месец го оперираше и коленото. По пристигнувањето во Белград се дружеше со пријателите, но штом почувствувал дека има температура веднаш отишол да се тестира.

– И сега имам мала темптература. Мислам дека доколку не се оперирав во Перуџа минатиот месец немаше да ми опадне имунитетот. Бидејќи епидемијата беше голема во Италија дури пет пати бев тестиран и сите резултати беа негативни. Пред да дојдам дома во Белград се тестирав уште еднаш за да не мора да одам во карантин и тој тест исто така беше негативен – додава одбојкарот.