Учениците од прва година средно кои ги исполнуваат условите за бесплатен превоз, билетите ќе ги добијат во матичните училишта, соопштија од Јавното сообраќајно претпријатие – Скопје.

-Всушност, сега ќе им бидат дадени времени билети, кои во меѓувреме ќе бидат заменети со „Скопска“ – додаваат од ЈСП.

Учениците од повисоките одделенија, во случај да имаат потреба од нова персонализирана електронска картичка „Скопска“ – поради изгубена картичка и слично, нова можат да обезбедат во кој било центар за персонализација на ЈСП Скопје.

-Притоа, неопходно е да достават потврда од училиште и да платат еднократен надомест од 200 ден за изработка на картичката – се наведува во соопштението.

Од ЈСП потсетувааат дека средношколските билети за бесплатно користење на јавен превоз, важат за сите линии – градски и приградски во период од 5 до 24 часот, односно, единствено не важат за користење на ноќни линии.