Министерот за внатрешни работи Оливер Спасовски на деннот на младите вели дека е горд што младите се носители на прогресивната идеја за европската иднина на земјата и напредокот на македонското општество.

Вашиот глас е гласот на иднината и столб на процесот за Европа – дома. Честит Меѓународен ден на младите – 12 август, објави Спасовски.

По повод меѓународниот Ден на младите, Спасовски на Фејсбук објави честитка во која ги повика младите на заедничка соработка за подобро образование, фер шанса, пристап до финансии и фондови, можности за добро платени работи места, подобар животен стандард, подобри услуги.

– Нема да дозволиме да бидете жртва на политичари на кои национализмот им е дневна доза за лични цели, без став, без визија, кои имаат само желба за гола власт. Нема да дозволиме нова изолација, нови бранови иселувања на младите, нови купувања на странски пасоши. Затоа направивме се’ за татковината да биде најбезбедна на Западен Балкан, во друштво на најбезбедните 36 во светот – предуслов за квалитетен живот, напиша Спасовски.

Тој вети дека заеднички ќе биде остварен генерацискиот сон младите да бидат конкурентни со европските врсници.

Да живеете во праведна и еко држава, која ги вреднува вашите таленти. Досега со конкретни политики и финансиска поддршка, создадовме подобри услови, отворивме стотици илјади работни места, со Младинската гаранција и проектите за самовработување и дообразување имаме одлични резултати. Донесовме Закон за младинско учество и формиравме Национално советодавно тело за младински политики. Ги покачивме студентските стипендии за 100% и воведовме субвенциониран студентски оброк со 2.400 денари месечно. Обезбедивме неповратни средства од 5.000 до 15.000 евра за отварање на сопствен бизнис за млади, како и неповратна финансиска помош за млади земјоделци. Продолжуваме со унапредувањето на квалитетот на животот на сите млади, дома во европска Македонија, се вели во честитката од Спасовски.