Во Националната опера и балет на 11 април, во 20 часот, започнува 20-то јубилејно издание на интернационалниот фестивал „Танц фест Скопје 2024“ под мотото „Сирово: од движење до виртуозност – 20 години Извонредност во современиот танц“.

Дваесеттото фестивалско издание започнува со програмата насловена „Паралели“, која ја означува соработката на фестивалот и Националната опера и балет, а во која ќе се прикажат три современи кореографии на домашни автори.

– Програмата „Паралели“ претставува една парабола која го поврзува Националниот балет со современата танцова сцена. Таа е од големо значење и претставува сведоштво за имплементирање на модерниот израз во балетот врзан исклучиво за македонски кореографи. Развојот на македонските кореографи обединет во едно, се годинашните „Паралели“ – истакнува уметничкиот раководител на Националниот балет, кореографката Олга Панго, чија претстава, современиот балет „Госпоѓиците од Авињон“, ќе го отвори фестивалот.

Претставата е една од најзабележителните продукции на рецентната македонска балетска сцена, чии автори се Калиопи (музика), Олга Панго (кореографија), Сашо Димоски (либрето), Валентин Светозарев (сценографија) и Раде Василев (костимографија).

Премиерата се одржа на 9 март 2021 година, а покрај редовните изведби на репертоарот на НОБ, во изминативе години претставата гостувала во Народно позориште Белград, Пловдивската опера, Софискиот музикален театар, Народно позориште Сараево, била изведена на фестивалот „Охридско лето“, како и на сцените во Велес, Куманово и Битола.

Покрај исклучителната авторска екипа, во балетската деконструкција/коментар на познатата слика на Пабло Пикасо учествуваат балетските уметници од НОБ: Александра Мијалкова, Мими Поп Алексова, Саша Евтимова, Ивана Коцевска, Христина Наќевска, Мирослав Митрашиновиќ, Балаш Лочеј, Ендру Кук и Агим Бафтии.

Во склоп на програмата „Паралели“ во рамки на фестивалот „Танц фест Скопје 2024“ следуваат претставите „Сага“ на кореографката Рисима Рисимкин, на музика на Тони Китановски, сценографија на Матеа Мијановиќ и костими на Благој Мицевски на 16 април, а на 23 април на сцената на НОБ ќе биде изведен балетскиот триптих „Молитви на моето тело“, чиј идеен творец е костимографот Александар Ношпал, драматург е Соња Здравкова-Џепароска, а кореографиите се на Ивана Коцевска, на музика на Дарија Андовска, на Адријана Данчевска, на музика на Александар Гроздановски и на Саша Евтимова, на музика на Александар Пејовски.

Фестивалот ќе има одбележување на јубилејот на 30 април на сцената на МНТ, кога ќе биде доделена наградата „Менада“ на доајенот на македонскиот балет Марин Црвенов, а се затвора со светската кореографска ѕвезда Мурад Мерзуки на 17 мај на сцената на Македонскиот народен театар.

Јубилејното издание на фестивалот е поддржано од Министерството за култура, Францускиот институт, Виталија, Бовин, Австриската амбасада во Скопје, а програмата се изведува во соработка со НОБ, МНТ, МКЦ, Националната галерија. Медиумски покровители се МРТВ, Радио Антена5, Радио Бубамара, Метрополис, Сити радио, Урбан ФМ.