Богатството на 81-годишниот Пол Макартни, основач на легендарната група „Битлси“ се зголеми поради „бројните турнеи, вредниот каталог и малата помош од Бијонсе“ која ја обработи познатата песна „Blackbird“, која музичарот ја напиша во 1968 година. Богатството на Макартни сега се проценува на една милијарда фунти, пренесува Би-би-си.

Списокот на богати на „Сандеј тајмс“ покажа дека бројот на милијардери во Велика Британија е намален на 165, од рекордно високо ниво од 177 во 2022 година. Дел од причината лежи во планот на владата да ја прекине мерката според која жителите на Велика Британија не плаќаат данок на приходи во странство следната година.

Списокот покажа дека и богатството на кралот Чарлс Трети се зголемило за 10 милиони фунти, на вкупно 610 милиони фунти, благодарение на зголемувањето на вредноста на неговиот недвижен имот.

Инвеститорот со индиско потекло Гопи Хиндуџа, вреден 37 милијарди фунти, е на врвот на листата трета година по ред.