Вториот носител на УС Опен, Данил Медведев со рутинска победа го започна настапот на последниот годишен грен слем турнир. Русинот за нешто помалку од два часа игра со 6:4,6:3,6:1 го победи Ришар Гаске и дојде до 200. победа во кариерата.

Контроверзниот австралиски тенисер Ник Кирјос пак експресно го заврши настапот на УС Опен, откако за еден час и 50 минути игра загуби од Роберто Баутиста Агут со 6;3,6:4,6:0. Интересно е што Кирјос имаше само една брејк шанса во текот на целиот меч и таа се случи во првиот гем. Баутиста Агут првите два сета ги доби со по еден направен брејк, додека во третиот го остави својот противник на нула.

Кај дамите, третата фаворитка Наоми Осака со 6:4,6:1 ја совлада Мари Бузкова од Чешка. Елина Свитолина исто така во два сета ја реши Канаѓанката Марино, додека Арина Сабаленка и Елис Метенс мораа да играат три сета против Стојановиќ односно Петерсон за да се пласираат во второто коло.