Харизматичната Полина Тасева има богато музичко педигре – дипломирала на отсекот за соло пеење на Факултетот за музичка уметност – Скопје во 2016 г., а во 2019 година завршила магистерски студии по интерпретација и композиција.

Во текот на студирањето настапила на концерти организирани од ФМУ, како настапи со оркестарот на НО. Во 2015 г., на натпревар во Софија добила награда за впечатлив и забележителен глас, со тоа што била одбрана од вкупно 50 натпреварувачи да гостува во Москва на познатиот натпревар за руски романси „Романсиада“. Во 2016 година дебитирала на сцената на НО во улогата на Рита во комичната оперска претстава „Рита“ од Гаетано Доницети, како и во улогата на мајката на Црвенкапа во детската претстава „Црвенкапа“, која беше премиерно изведена на Мајските оперски вечери 2016 година.

Убавата и талентирана Полина покрај операта, паралелно се занимава и со пеење на забавна музика. Прва нејзина песна е нумерата „Broken“ на англиски јазик, во соработка со Томи Тасев. Првата авторска песна како целосни автори со Иван Петровски е песната „Игра“ во продукција на Роберт Билбилов, додека втора нејзина песна е „Сѐ се врти во круг“, која беше дел од фестивалот за авторска песна „Макфест 2020“. Полина на „Макфест“ се закити со наградата за „Дебитант“ за 2020 година. Третата авторска песна е насловена „Ти“. Оваа година Полина повторно блесна на макфестовската сцена, овојпат со „Огледало“ – тема на чие создавање Полина работеше со Иван Петровски.

Полина овојпат ни долови како се одвива едно нејзино деноноќие.

„Започнувањето на денот сакам да ми биде смирен и позитивен. За да си го причинам тоа задоволство, првата работа што ја правам е рутинската нега на моето лице. По тој процес следува подготовка на овошно смуди и топло кафе. Кафето го пијам со добра музика, која секогаш е присутна во тој период од денот. Додека уживам во кафето и во музиката, најчесто се подготвувам за обврските што следуваат, одбирам комбинација на облека и продолжувам со шминкање и средување на косата. Сакам кога ќе излезам од дома да се чувствувам задоволно и среќно со тоа што го носам на себе.

Моите обврски како музичар се секогаш различни, зависно од тоа на каков проект работам во моментот. Најчесто се работи за музички проби, креирање на своја музика, настапи и слично.

Во овој период од годината, пред и по новогодишниот период, секој ден ми е исполнет со музички ангажмани, соработки, концерти и настапи кои целосно ме исполнуваат. Од бројните настапи, последно ќе го издвојам концертот на Божиќниот оркестар и хор во „Сити Мол“, кој беше музички спектакл каде што настапив како солист со уште многу музичари кои беа дел од целиот ансамбл. Изведовме новогодишни песни, кои мене лично во овој период од годината ми се омилени, затоа што предновогодишната еуфорија ја прават уште помагична.

Откако ќе ги завршам дневните обврски, сакам да поминам време со моите најблиски и со пријателите. Време за разговор, топол оброк и кафе. Во вечерните часови, кога немам ангажмани и настапи, одморот го прилагодувам на моменталното расположение, без разлика дали се работи за гледање филм, читање книга, цртање или проследување на концерти од моите омилени артисти.“