Добрила Грашеска е една од оние пејачки чиј вокал милува, негува древни, македонски ноти и создава чувство на кроткост и архетипност. Убавината и топлината во нејзиниот глас е дел од „Чалгија саунд систем“, но и од дуото „Добрила и Дориан дуо“.

Прилепчанката со чешита смисла за хумор и ведрина што блика, Добрила, ни го раскажа својот совршен ден…

„Моите обврски? Во еден ден тие се навистина многу и ако почнам да ги набројувам можат да посеат немир кај некои луѓе. Ама… колку и да се, јас не им се плашам и знам дека ќе направам сѐ што треба, дел поради тоа што сама сум си ги одбрала, дел поради мојот прилепски инает.

Еве, утре на пример, знам дека од 9 до 15 ќе треба да бидам креативна и да напишам нешто што кај луѓето ќе предизвика емоции. И тоа позитивни, се разбира. Но, претходно ќе пијам кефир и кафе на мир и ќе слушам музика.

На работа ќе треснам на бирото неколкупати (бидејќи мислите не „одат“ како подмачкани, па ќе им се исплачам на колегите (кои се многу супер) и на крај, откако ќе ги решиме маките, ќе се смеам со нив.

Попладне, додека си одам пешки накај дома, а тоа трае еден час, ќе слушам нешто што во последно време ми е „залепено“ на душава, а тоа е еден прекрасен албум на Сан Кил Мун (San Кill Мoon), „Admiral fell promises“.

Дома, повторно одбирам музика определена за поддршка на готвењето. (Што е предвидено за утрешниот ручек? Спанаќ!). По ручекот доаѓа време кога се подготвувам да одам во студио, каде што заедно со Дориан (другар ми од „Чалгија саунд систем“ и „Добрила и Дориан дуо“) подготвуваме нешто ново. И така до 23 часот.

Но тоа не е сѐ! Тогаш доаѓа време на политичка или временска анализа на денот што поминал и тоа најчесто со таксистите кои веќе научија која адреса ја нарекувам дома. Но, кога на сето ова ќе се додаде сонцето или снегот и бројот на луѓето што ги сакам и гушкам во еден ден, тогаш 100 отсто знам дека утрешниот ден ќе биде совршен.“