Германскиот канцелар Олаф Шолц, во име на Социјалдемократската партија на Германија, упати порака со поддршка за Социјалдемократскиот сојуз на Македонија, за претседателот на партијата Димитар Ковачевски и за претседателскиот кандидат Стево Пендаровски, за претстојните избори и за натамошниот европски пат на Македонија кон полноправно членство во ЕУ.

– Изборот е во ваши раце, порача Шолц во видео пораката што беше прикажана на одбележувањето на почетокот на кампањата на СДСМ за парламентарните избори и додаде дека европската иднина на Северна Македонија ќе се поддржи со давaњето на гласот за СДСМ, со Димитар Ковачевски како премиер и Стево Пендаровски како претседател.

Тој кажа дека патот кон ЕУ не беше лесен за Северна Македонија, како и дека неуспесите и одложувањата разбирливо доведоа до разочарување во нашата земја.

– Но, ве молиме не дозволувајте ова да ги поткопа вашите европски амбиции. Ова е вистинскиот пат и имам целосна доверба дека тие успешно ќе ја водат Северна Македонија до целта и во Европската унија, нагласи Шолц.

Тој исто така посочи дека нема сомнеж дека за тоа се потребни тешки одлуки, одлуки кои бараат храброст и лидерство кое што, според него, „народот на Северна Македонија и СДСМ го покажале во минатото“, а убеден е дека тоа ќе го покажат уште еднаш.