Пристапувањето на Финска во НАТО создава ризик од значително проширување на конфликтот, изјави денеска рускиот министер за одбрана Сергеј Шојгу на состанокот на раководството на руските вооружени сили. Тој рече дека НАТО ја зајакнува својата антируска насока и дека влегувањето на Финска во алијансата претставува опасност од ширење на конфликтот.

Тој исто така рече дека белоруските авиони сега можат да носат руски нуклеарни проектили, потег што најверојатно ќе ги зголеми тензиите, пренесува Ројтерс.

Финска денеска ќе се приклучи на НАТО, проширувајќи ја одбранбената алијанса на 31 членка, откако го надмина противењето од Турција. Таа го поднесе барањето заедно со Шведска во мај 2022 година по руската инвазија на Украина.

Турција продолжува да ја блокира кандидатурата на Шведска за членство поради низа спорни прашања, вклучително и загриженоста на Анкара поради, како што вели, недостигот на соработка во борбата против тероризмот. Членките на НАТО мора едногласно да се согласат да примат нови земји.