Шојгу ги провери нуклеарните подморници на рускиот Далечен Исток
Рускиот министер за одбрана Сергеј Шојгу денеска изврши увид во поправката и модернизацијата на нуклеарните подморници на руската пацифичка флота во едно од водечките воени бродоградилишта, соопшти руското Министерство за одбрана.
Претходно оваа недела, Шојгу учествуваше во разговорите меѓу претседателот Владимир Путин и севернокорејскиот лидер Ким Џонг Ун, кој денеска посети две фабрики за авиони во градот Комсомолск на Амур.
Шојгу изврши увид во изградбата на пловечки пристанишен комплекс и поправка и модернизација на нуклеарни подморници во фабриката „Звезда“ во градот Бољшој Камен, се вели во соопштението на Министерството за одбрана. Во соопштението се додава дека Звезда е водечка компанија за поправка на подморници на руската Пацифичка флота и единствена на рускиот Далечен Исток која е специјализирана за поправка и модернизација на ракетни подморници со нуклеарен погон.
– Сергеј Шојгу побара производствените капацитети на Звезда да бидат максимално оптоварени со цел да се заврши поправката и модернизацијата на подморниците, соопшти Министерството за одбрана.
Шојгу ја посети и фабриката „Прогрес“ во градот Арсениев, во која се произведуваат воени хеликоптери Ка-52. Тој нагласи колку е важно да се подобрат борбените способности на хеликоптерите Ка-52М и заштитата на нивните пилоти.
– Мора да се подобрат борбените способности на хеликоптерите Ка-52М и да се зголеми заштитата на пилотите, рекол рускиот министер за одбрана.