Шефот на американската дипломатија на турнеја низ арапските земји
![](https://www.slobodenpecat.mk/wp-content/uploads/2023/10/ентони-блинкен.jpg)
Американскиот државен секретар Антони Блинкен денеска ја почна турнејата низ арапски престолнини додека се обидува да го зајакне притисокот врз Хамас, а Израел подготвува копнена офанзива врз Појасот Газа по нападите на милитантите.
Највисокиот американски дипломат во Аман ќе се сретне со јорданскиот крал Абдула Втори, долгогодишен партнер на САД, и со палестинскиот претседател Махмуд Абас, потоа ќе ги посети Катар, Саудиска Арабија, Египет и Обединетите Арапски Емирати.
Блинкен вчера беше во Тел Авив каде вети непоколеблива солидарност на американскиот сојузник Израел по ненадејната офанзива на Хамас на 7 октомври, кој уби над 1.200 луѓе и зеде околу 150 заложници.
Израелските власти денеска повикаа на итна евакуација на 1,1 милион луѓе во Појасот Газа, кој е под контрола на Хамас, што веќе е под израелска блокада.
Катар, каде Блинкен ќе замине веднаш по Јордан, има долгогодишни врски со Хамас и се сметаше за посредник во ослободувањето на заложниците.
– Ќе продолжиме да ги притискаме земјите да помогнат да се спречи ширењето на конфликтот и да ги искористиме нивните влијанија врз Хамас за веднаш и безусловно да се ослободат заложниците, рече Блинкен синоќа во Тел Авив.