Монументална гробница украсена со релјеф од две човечки фигури во речиси природна големина, за кои се верува дека претставуваат млад брачен пар, е откриена за време на ископувањата во Помпеја во јужна Италија, пренесуваат странските медиуми.

Погребниот релјеф бил пронајден за време на ископувањата што започнаа во јули 2024 година како дел од „истражувањето на археологијата на смртта во истражувачкиот проект Помпеја“.

Областа што се истражува од јули 2024 година, која се наоѓа источно од Порта Сарно, одговара на зоната ископана во 1990-тите за изградба на регионалната железничка мрежа „Циркумвесувиана“ (Circumvesuviana). Тогаш биле идентификувани повеќе од 50 гробови за кремирање и надгробна плоча со лак.

Според археолозите, благодарение на врежаните детали, сопругата може да биде „идентификувана како свештеничка од Церера“, додека сопругот, висок 175 сантиметри, изгледа дека е „римски државјанин кој се истакнува по тоа што носи тога“.

„Ова истражување е драгоцена можност за проширување на активностите за пребарување и евалуација во областа надвор од ѕидините на Помпеја“, рекол Габриел Цухтригел, германскиот директор на археолошкиот локалитет.

Градот Помпеја, во подножјето на планината Везув, бил покриена со пепел, кал и лава во 79 н.е. по неколку вулкански ерупции. Неговите остатоци беа повторно откриени во 18 век, а местото на ископување сега е една од најпопуларните туристички атракции во Италија. Зачуваните остатоци од уништувањето на градот даваат увид во животот во тоа време.