Група на селани во западна Кенија го пронашле и убиле серискиот убиец на деца кој пред два дена побегнал од затвор.  

Мастен Вањала бил пронајден од страна на селаните во Бунгома, потоа бил претепан до смрт, соопшти полицијата, пренесе Би -Би -Си. 

Полицијата започна обемна потрага по бегалецот, кој признал дека убил повеќе од 10 момчиња за пет години. Вањала исто така признал дека ги дрогирал и во некои случаи, им ја пиел крвта на децата, поради што го добил прекарот „вампирот“.  

Наводно, Вањала се вратил во куќата на неговите родители, кои го напуштиле, но соседите го нашле, го претепале и удавиле пред да пристигне полицијата, изјавил очевидец за локалните медиуми.  

Лажен фудбалски тренер

Вањала се претставил како фудбалски тренер и на тој начин ги намамувал жртвите на скриени места каде потоа ги напаѓал и убивал. Кога бил уапсен во јули, ја одвел полицијата на местото каде што ги погребувал телата.  

Тројцата полицајци кои биле на должност кога тој побегнал од затворот во средата, се обвинети за помагање на осомничениот во бегство и негрижа.  

Полицијата забележала дека им недостасува еден затвореник за време на утринската прозивка. Јавноста сега бара од шефот на кениската полиција да поднесе оставка поради бегството, што ја шокираше нацијата, пренесува Би -Би -Си. 

Убил десетици деца и ја пиел нивната крв: Од кениски затвор побегнал сериски убиец